Von Trudi Zumsteg, Möhlin
I möcht no einisch Wiehnacht erläbe,
mini Eltere vo domols im Traum nomol gseh.
D'Stimmig gschspüre vo Wiehnacht uf Ärde,
Wiehnacht, Wiehnacht im Schnee.
I möcht de Duft vom Guetzli bache
no einisch dur mis Näsli zieh,
und us der Guetzlibüchs ganz heimlich
eis stibitze öppedie.
Min Wunsch: Die Gschichte nomol z'ghöre
vom Chrischtchindli, wo d'Gschänkli bringt.
Und dass mes jo nit dörfe störe
wenn s'Glöggli us der Stube klingt.
Au wenn denn voll Erwartig
ich i der Chuchi fascht vergizle,
Im Übermuet und Gwunder
dur s'Schlüssellöchli gügsle.
Möcht ändlich nach em lange Warte
i der Stube vor em Bäumli stoh,
no einisch de Moment erläbe
mit stundelangem Ah und Oh.
In Gedanke zrugg versetzt
gseh ich säll Bäumli härzig chli,
gschmückt mit Cherzli, Silbervögeli,
Schoggimüsli und Ängeli.
I hang an der Erinnerig,
bi dankbar, dass se git.
Grad jetze holt's mi wieder i,
es isch Advänt, s'isch Wiehnachtszit.
