Von Erika Hugentobler-Lützelschwab, Magden
Valentinsdag
Dr Valentin hetts würklich geh,
das cha me us dr Gschicht entneh.
Är isch Bischof, tuet in Terni wohne
tuet Liebespaar mit dr Trauig belohne.
Zu dere Zyt herrscht es kaiserlichs Verbot,
dass es chrischtlichs Paar vor em Traualtar schtoht.
Drum richtet me ihn am 14. Februar 269 hi
so dörf är sit denn e Märtyrer si.
Schpöter hett me jungi Männer und Fraue per Los zooge
als Valentinspaar sölle sies zämme wooge.
Mit Gschänk und Gedicht tusche sich die Paar us
mit dene Brüüch entschtoht dr Valentinsdag drus.
Mach Dis Härz uf, tue kei Zyt me verliere
tue Dini Liebi mit eme Gschänk oder Gedicht zelebriere.
Tue Dim Schätzli Tulpe oder roti Rose chaufe
so bliebts bi Dir und wird Dir nit dervo laufe.
Schtatt Tulpe, Rose oder Praline
chönnsch mir au öppis anders geh,
denn ich säg zu Dir ganz schlicht:
«liebe Schatz VERGISSMEINNICHT»!
