Von Erika Hugentobler-Lützelschwab, Magden
Neulich bim Email checke, fallt mer uf, im Text drin wiest me mi uf folgendes druf: / Ich söll mini Ischtellige verändere im Programm, damit das Email nit landi im Ordner «Spam». / Das wunderet mi nit, bi dere Email-Fluet, dass me mi bsunders uf öppis hywiese duet. / Und s heisst, i söll es längers Passwort gschtalte, scho guet, aber das cha doch kei Mösch im Chopf bhalte! / Keis Problem, für das gäbs uf dr Maschine e Software und die z benütze sig gar nid eso schwer. / Mit Zahle, Buechschtabe und Sonderzeiche chönn ich es sicherers Passwort erreiche! / Überhaupt, zum die ganze Date verwalte, chönn ich mir es File in dr I-Cloud gschtalte. / Das heisst, innere Wulke wird alles archiviert, ich hoff nur, dass die Wulke nüt verliert! / Vo dört holsch denn d Date wieder zrugg uf e Computer über e Himmelsbrugg. / Isch jedoch d Wulke furt, isch alles für d Chatz? Jä no, so hesch uf em Computer wieder Platz!
