Von Erika Hugentobler-Lützelschwab, Magden
Ich weiss, s Schtärbe cha me nit plane,
aber wo füehrt eus dr Liebgott nachhär ane?
Hetts würklich Platz für all die Seele?
Chame d Fründe und Kollege au uswähle?
Bi gschpannt, wie me ab dr Ärde schtartet
und was eim dört obe alles erwartet?
Ischs ächt dunkel oder hell?
Warm oder chalt?
Bin ich unsichtbar oder in Form von ere Gschtalt?
Ich weiss, vill Froge, und niemer cha säge, was me bim Schtärbe denn söll mitträge.
Drum gib im Läbe vo Dir nur s Bescht.
Heb kei Angscht, freu Di ufs Himmelsfescht.
Chumm ich in irgendeiner Form wieder zur Ärde, will ich es Tierli und kei Mönsch me wärde.
Schöni Oschtere.
